Tymi i duhanit dëmton edhe fëmijët e shëndoshë

Edhe fëmijët e shëndoshë, të prindërve duhanpirës, mund të kenë probleme me organet e frymëmarrjes, ndërsa situata e tyre mund të përkeqësohet nëse vazhdojnë t’i ekspozohen tymit të duhanit.

Prindërit duhanpirës gjithsesi janë lajm i keq për fëmijët e tyre – madje edhe atëherë kur këta fëmijë janë të shëndoshë'", ka deklaruar dr. Bert Arets nga Universiteti Utrecht për agjencinë Reuters.

Studimet e shumta kanë dëshmuar se, fëmijët që kanë prindër duhanpirës, kanë më shumë telashe me frymëmarrje se ata, prindërit e të cilëve nuk pinë fare duhan. Megjithatë ende nuk është bërë e ditur se si ndikon tymi të fëmijët që nuk kanë probleme me mushkëri dhe nuk lëngojnë nga sëmundjet e llojit të astmës.

Arets dhe bashkëpunëtorët e tij kanë hulumtuar punën e mushkërive te 244 fëmijë të moshës 4-12 vjeçare dhe kanë zbuluar se të fëmijët e duhanpirësve puna e mushkërive është më shumë e vështirësuar.

Sidoqoftë, ndalimi i sotëm i pirjes së duhanit në vendet publike, e bën profesorin Arets të brengosur, ngase sipas tij, prindërit do të mund të pinin më shumë duhan në shtëpitë e tyre.