Shqipëria, maja e turit europian të Bushit

Pika kulminante e turit europian të Presidentit Bush mund të jetë pikërisht vizita e tij e të dielës në këtë shtet të vogël, një nga të paktat vende ku ai mund të shijojë tendenca të palëkundura pro-amerikane. Këtu, amerikanët priten me një adhurim aq të lartë saqë të bën ndihesh sikur po jeton në një kohë tjetër.

“Shqipëria është me siguri shteti më pro-amerikan në Europë, në mos në të gjithë botën,” tha Edi Rama, kryebashkiaku i Tiranës dhe lideri i opozitës socialiste. “Askund tjetër nuk mund të gjesh kaq shumë respekt e mikpritje për Presidentin e SHBA. As në Micigan, ai nuk do pritej kaq ngrohtësisht.”



Mijëra të rinj shqiptarë quhen Bill ose Hilari falë rolit të administratës Klinton në konfliktin e Kosovës. Pas vizitës së të dielës, shumë presin që një brez i ri bebesh të quhen Xhorxh.

Shqipëria është kaq e vendosur për të mirëpritur sa më mirë Presidentin Bush saqë Parlamenti aprovoi unanimisht një ligj që lejon forcat ushtarake amerikane të marrin pjesë në cdo lloj veprimtarie, përfshi këtu edhe dhunën, në funksion të garantimit të sigurisë së Presidentit. Si rrjedhim, një nga të përditshmet mbante titullin: “Ju lutemi, na pushtoni!”, si përgjigje ndaj entuziazmit të paparë në vend.

Gjatë kohëve të fundit, Europa ka dhënë shenja të një ri-afrimi me Amerikën, duke e zvogeluar kështu ndarjen ideologjike të shkaktuar nga lufta në Irak. Presidenti i ri i Francës, Nicolas Sarkozy, është i vendosur të harrojë konfliktet e paraardhësit të tij me SHBA. Vetëm disa ditë pasi erdhi në pushtet, kancelarja gjermane Angela Merkel deklaroi se Gjermania kishte më shumë vlera të përbashkëta me SHBA sesa me Rusinë. Dhe Gordon Brown, zëvendësuesi i Tony Blair në Britaninë e Madhe, pritet të ruajë të ashtuquajturat “marrëdhënie speciale” me aleatët amerikanë. Pra, duket qartë, se Europa perëndimore po i “ngroh” gjithnjë e më shumë relacionet me Amerikën.

Sidoqoftë, edhe në Europën e “Re”, sic quhen rëndom shtetet ish-komuniste të Europës Lindore e Qëndrore, Shqipëria luan një rol të vecantë. Një pjesë e mirë e Europës Lindore ka mbajtur pozicion kritik ndaj Bushit, e nxitur nga shqetësimi se plani amerikan për mburojën anti-bombë do të alienojë Rusinë e rrjedhimisht mund të rrezikojë rindezjen e sentimenteve të kohës së luftës së ftohtë. Shumë prej këtyre shteteve, përfshi Cekinë e Poloninë, janë gjithashtu të pakënaqura nga mungesa e liberalizimit të vizave për në SHBA edhe pasi këto shtete u bënë pjesë e Bashkimit Europian.

Në Shqipëri ama, ku mbështetja për Amerikën nuk ka patur asnjë lëkundje, Bushi nuk ka asgjë për t’u shqetësuar. Ndërsa shumica e botës e kritikon Presidentin amerikan për nxitje lufte, unilateralizëm dhe shkelje të lirive civile, Shqipëria vazhdon t’a dashurojë pa kufi.

Bush do të jetë i pari president amerikan që të vizitojë këtë shtet të vogël, dhe vizita e tij nuk mund të përkonte me një ditë më të favorshme: 8-vjetorin e fillimit të tërheqjes së trupave serbe nga Kosova dhe ratifikimin të marrëveshjes së paqes në Rambuje. Bush po mundohet të bindë Këshillin e Sigurimit të OKB që të aprovojë planin për pavarësinë e kushtëzuar të Kosovës.

Ditët e fundit, shqiptarë të shumtë po vijnë në kryeqytet nga i gjithë rajoni. Dhoma të lira në hotele ka po aq pak sac ka sentimente anti-amerikane.

Shqiptarët e mbështetën pothuajse unanimisht luftën në Irak, dhe dështimet e politikës së jashtme amerikane anashkalohen në mënyrë të rregullt. Një kërkim dy ditor për një person me autoritet që mund të ofronte një kritikë ndaj SHBA rezultoi në një emër të vetëm, dhe madje, ai person i vetëm ishte jashtë shtetit.

Cdo nxënës shqiptar e di mirë se Presidenti Wilson shpëtoi Shqipërinë nga copëtimi prej fqinjëve pas Luftës I Botërore, dhe cdo i rritur t’a përsërit të njëjtin fakt historik kur e pyet pse shqiptarët janë kaq të apasionuar pas SHBA.
James Baker u habit nga turma që e mori përpara kur ai vizitoi Shqipërinë në 1991-shin në rolin e sekretarit të shtetit. Në atë kohë, pati edhe thirrje për referendum në vend që të vendi të vetë-deklarohej shteti i 51-të amerikan.

“Nuk ka fjalë që t’a shpjegojnë gëzimin e shqiptarëve për këtë vizitë,” tha ministri i jashtëm, Lulzim Basha. “Ne mendojmë se ky është një moment historik që do mbahet mend për dekada të tëra.”

Vizita e Bushit është një shpërblim i mbështetjes së palëkundur shqiptare ndaj politikës së jashtme amerikane. Shqipëria ishte nga të parët vende që mbështetën tërheqjen e SHBA nga juridiksioni i Gjykatës së Krimeve Ndërkombëtare. Gjithashtu, vendi ishte nga të parët që cuan trupa ushtarake në Afganistan e Irak. Edhe sot, ushtarë shqiptarë vazhdojnë të jenë në këto dy vende.
“Derisa amerikanët të jenë atje, ushtarët tanë do të mbesin,” tha Presidenti Alfred Moisiu plot krenari.